Shpenzimet e mbrojtjes në BE arrijnë rekorde historike: 343 miliardë euro në 2024
Për herë të parë në historinë e Bashkimit Evropian, shpenzimet e mbrojtjes së 27 shteteve anëtare arritën një nivel rekord prej 343 miliardë eurosh në vitin 2024, një rritje prej 19% krahasuar me vitin 2023, duke përbërë 1.9% të Prodhimit të Brendshëm Bruto të BE-së.
Raporti vjetor i Agjencisë Evropiane të Mbrojtjes (EDA) për vitet 2024-2025 zbulon se investimet në pajisje dhe teknologji mbrojtëse tejkaluan për herë të parë 100 miliardë euro, ose 31% të shpenzimeve totale, shifër kjo më e larta që nga fillimi i mbledhjes së të dhënave nga EDA.
“Rritja është kryesisht e nxitur nga blerjet rekord të pajisjeve dhe investimet në kërkim dhe zhvillim, duke pasqyruar vendosmërinë e shteteve anëtare për të forcuar kapacitetet ushtarake të Evropës në një mjedis sigurie gjithnjë në zhvillim”, tha EDA.
Megjithëse shpenzimet pritet të rriten më tej në vitin 2025, raporti nënvizon se ato ende mbeten më të ulëta se të Shteteve të Bashkuara, duke theksuar nevojën për investime të qëndrueshme dhe bashkëpunim të ngushtë mes forcave të armatosura të BE-së.
Përfaqësuesja e Lartë e BE-së, Kaja Kallas, deklaroi: “Evropa po shpenzon shuma rekord për mbrojtjen për të garantuar sigurinë e qytetarëve tanë. Këto investime do të drejtohen në të gjitha fushat, nga kërkimi dhe zhvillimi te prokurimi i përbashkët dhe prodhimi i komponentëve thelbësorë të mbrojtjes.”
Ndërkaq, Presidenti i EDA-s, André Denk, shtoi: “Arritja e objektivit të NATO-s prej 3.5% të PBB-së do të kërkojë përpjekje edhe më të mëdha, me shpenzime totale që mund të tejkalojnë 630 miliardë euro në vit. Por bashkëpunimi dhe ekonomia e shkallës janë kyçe për efektivitetin dhe ndërveprimin mes forcave tona.”
Kjo rritje historike e shpenzimeve thekson përkushtimin e shteteve anëtare të BE-së për të forcuar sigurinë dhe kapacitetet mbrojtëse në një periudhë sfidash të reja globale.
